“Fiziologiya” kafedrası (2019-cu ildən “Fiziologiya” kafedrası ) “Kimya və biologiya ” fakültəsinin nəzdində fəailiyyət göstərir. Kafedra fakültənin aparıcı kafedrasıdır. Bakalavriat səviyyəsində və yüksək elmi dərəcəli pedaqoji kadrlar hazırlayır. Kafedra yalnız Kimya və biologiya fakültəsində deyil, “İbtidai təhsil”, “Məktəbəqədər təlim”, “İncəsənət və Fiziki tərbiyə” fakültələrində də müəyyən fənləri tədris edir. Həmçinin Universitetin bütün fakültələrində Mülki müdafiə və ilkin tibbi yardım fənni də tədris olunur. 1930-1931-ci illərdə Universitetin bazası əsasında sahə İnstitutları və o cümlədən alı təhsil müəssisəsi kimi Pedoqoji İnstitut təsis olunmuşdur. Bu vaxt bioloji kafedraların bir hissəsi Tibb İnsitutunun strukturuna, bir hissəsi isə V.İ.Lenin adına Pedoqoji İnstitutun  təbiətşünaslıq  fakültəsinin tərkibinə daxil olur. Pedoqoji  İnstitutda Fiziologiya kafedrasının ilk müdiri  dosent Azad bəy Əmirov olmuşdur. A.Əmirov  “Əzələ və qan arasında karbohidrat mübadiləsi ” mövzusunda  doktorluq dissertasiyası yazmış və 1936-cı ildə  o professor vəzifəsinə seçilmişdir. 1939-cu ildə A.Əmirovun  vəfatından sonra Fiziologiya kafedrasına Savalan Rüstəm oğlu Ocaqverdizadə başçılıq etmişdir. 1951-ci ildə “Fiziologiya”  kafedrasına biologiya elmləri namizədi, dosent Tələt Dəniyar oğlu Qayıbov müdir vəzifəsinə seçilmişdir. T.Qayıbov 1961-ci ildə Moskvada N.İ.Piroqov adına Tibb İnstitutunda  doktorluq dissertasiyası müdafiə etmişdir. Həmin vaxtda “Fiziologiya” kafedrasının tərkibinə  “İnsan anatomiyası”, “Histologiya” və  “Sitologiya”  fənləri də daxil edilir. 1963-cü ildə professor T.Qayıbovun təşəbbüsü ilə “Fiziologiya” kafedrasının nəzdində “Elmi-tədqiqat  problem laboratoriyası” yaradılmışdır. Problem  laboratoriyasının  əsas  tədqiqat  sahəsi  radiobiologiya  məsələlərini  postnatal  ontogenezdə  orqanizmin  rezistentliyinin dəyişilməsi ilə əlaqəli şəkildə tədqiq etmək olmuşdur. Problem laboratoriyasında aparılan təcrübələrdə  ümumi  zülalın miqdarı, albumin-qlobulin  nisbəti, lipid mübadiləsi, sərbəst və əlaqəli şəkərin miqdarı nuklein turşularının  metobolizmini və s. postnatal ontogenezdə radioaktiv şüalanmanın təsirinin  tədqiqi olmuşdur.  Müəlliflər radioaktiv şüalanmaya məruz qalmiş heyvanlardan qan zərdabı almış və onu sağlam heyvanlara inyeksiya etdikdən sonra apardıqları  tədqiqat nəticəsində müəyyən etmişlər ki, belə halda heyvanda  kəskin şüa xəstəliyinin zərərli effekti nisbətən azalır. 1963-1970-ci illərdə Problem laboratoriyasının apardığı tədqiqat işlərinin nəticələri Respublika və İttifaq miqyasında nəşr  edilən mətbuat səhifələrində çap olunmuş və elmi forumlarda məruzə edilmişdir. Müəyyən edilmişdir ki, neonatal ontogenezdə və cinsi yetişkənlik dövründə heyvan orqanizmində gedən funksional və biokimyəvi dəyişilmələrinin səviyyəsi yuxarı yaş qrupuna  mənsub olan heyvanlarla müqayisədə daha kəskin olmuşdur. Problem  laboratoriyasının  apardıqları  tədqiqat  işlərinin  nəticəsi  olaraq  həmin  vaxtlarda  “Fiziologiya”  kafedrasının  əməkdaşlarından 8 nəfəri prof. T.Qayıbovun  və  prof.R.Səfərovun rəhbərliyi ilə namizədlik dissertasiyası müdafiə etmişdir. 1967-ci ildən 1993-cü ilədək kafedranın  müdiri professor, əməkdar elm xadimi Rza İbrahim oğlu Səfərov 1993-1994-cü illərdə professor, əməkdar elim xadimi Roza Zeynal qızı Qafarova olmuşdur. 1994-cü ildən-2017-ci ilədək  “Fiziologiya” kafedrasına biologiya elmləri doktoru,  professor Ədalət Nurulla oğlu Fərəcov  rəhbərlik etmişdir. 2017-ci ildən "Mülki müdafiə və tibbi biliklərin əsasları" kafedrası "İnsan və heyvan fiziologiyası" kafedrası ilə  birləşmişdir. 2017—2020- ci ilə qədər  "İnsan və heyvan fiziologiyası" kafedrasına Biologiya üzrə fəlsəfə doktoru  dosent  Nizam Mirxas oğlu Mehdizadə rəhbərlik etmişdir. Hazırda “Fiziologiya”  kafedrasına  2021- ci  ildən  etibarən  dos. Elnarə Cabir qızı Mehbalıyeva  rəhbərlik edir. Kafedrada fənlərin tədrisi azərbaycan , rus və ingilis  dillərində aparılır.